| |
musikene » Fundazioa |
|
Apirilaren 24ko 73/2001 Dekretuaren bitartez (86. EHAA, 2001eko maiatzaren 8koa), Eusko Jaurlaritzak erabaki zuen musikako goi-mailako ikasketak ezartzea 2001-2002 ikasturtetik aurrera. Dekretu horren 1. artikuluak zera ezarri zuen: “2001-2002 ikasturtetik aurrera EAEn Musikako Goi Mailako Ikasketak ezartzen hasiko dira pixkanaka, Hezkuntza Sistemaren Antolamendu Orokorrari buruzko Legearen arabera.” Agindu hori betez, 2001eko maiatzaren 2an, Eusko Jaurlaritzak Euskal Herriko Goi Mailako Musika Ikastegirako Fundazio Pribatua eratzea erabaki zuen; fundazio horren helburua musika-irakaskuntzarekin zerikusia duten ekimenak eta jarduerak irabazi asmorik gabe sustatzea izan behar zuen, eta Euskal Herriko Goi Mailako Musika Ikastegia sortzeko ardura zuen. Honen egoitza Donostian egongo zen. musikene EUSKAL HERRIKO GOI MAILAKO MUSIKA IKASTEGIRAKO FUNDAZIO PRIBATUAK nortasun juridiko propioa eta independentea du, eta bere estatutuek zein aplikatzekoak zaizkion legezko xedapenek arautzen dute, ondokoek bereziki: EAEko Fundazioei buruzko ekainaren 17ko 12/1994 Legeak, eta Euskal Autonomia Erkidegoko Fundazioen Erregistroa eta Babeslaritza Antolatu eta Jardunean Jartzeko Arautegia onartzeko urriaren 18ko 404/1994 Dekretuak. Fundazioaren finantzazio-iturri nagusiak hauek dira: Eusko Jaurlaritza, bai eta Goi Mailako Ikastegian matrikulatuta dauden ikasleek ordaintzen dituzten eskubideak eta zuzenbidean baliozkoa den beste edozein ekarpen ere. Patronatua da Fundazioaren gobernu, administrazio eta ordezkaritza organoa; nolanahi ere, legeek uzten duten neurrian zeregin horiek Fundazioaren beste organo edo langile batzuen esku uzteko ahalmena du; horixe egin du praktikan, eta hala, Koordinatzaile Nagusia, horretarako ahalordearen bidez, Fundazioaren ordezkaria da eta honen eskumen gehienak baliatzen ditu. musikene, Euskal Herriko Goi Mailako Musika Ikastegian sartzeko baldintzak, musikako goi-mailako ikasketak egin ahal izateko indarrean dauden araudian ezarritakoak dira, eta ezin da diskriminazio-motarik egin honakoak direla-eta: jaiotza, sexua, arraza, erlijioa, iritzia edo beste edozein egoera pertsonal edo sozial.
|
|
